அன்பர்களே!விதியை வெல்ல முடியாது; என்றாலும் ...

~~~~~~~~~~~~~

அன்பர்களே!விதியை வெல்ல முடியாது; என்றாலும் ...

~~~~~~~~~~~~~

அண்மைக் காலமாக வரும் மரணச் செய்திகள் அனைவரையும் அதிர்ச்சிக்குள்ளாக்கியுள்ளன. 

உறவுகள், ஆசிரியர்கள், உடன் கற்றவர்கள்,நம்மிடம் கற்றவர்கள், சமூக ஆர்வலர்கள்,சமுதாயத் தலைவர்கள், அதிகாரிகள், அமைச்சர்கள், சாமானியர் ...என எல்லாத் தரப்பினரும் இந்தப் பெருநோயால் பாதிக்கப்பட்டும் பலர் உயிர்நீத்தும் வருகின்ற செய்திகள் வந்தவண்ணம் உள்ளன.

இதற்கு வயது வித்தியாசமோ பார்க்கின்ற தொழில் வித்தியாசமோ கிடையாது.தலைவிதி எதுவோ அது நடந்தே தீரும். யாராலும் ஒரு விநாடிகூடத் தள்ளிப்போட முடியாது. ஜனாஸாவைக்கூட உறவினரும் சம்பத்தப்பட்டவரும் பார்க்க முடியாத, இறுதிப் பிரார்த்தனையில் கலந்துகொள்ள முடியாத பரிதாபம் இருக்கிறதே சொல்லிமாளாது.

இருப்பினும், நமக்கென சில தற்காப்பும் முன்னெச்சரிக்கை நடவடிக்கையும் தேவைதானே! அதைக் கடைப்பிடிப்பதில் நம்மிடம் கவனம் இருக்க வேண்டும் அல்லவா? 

முதலில் வெளியே போவதை இயன்ற வரை தவிருங்கள். அடுத்து நோய்த் தடுப்பு நடவடிக்கைகளை அலட்சியமின்றி மேற்கொள்ளுங்கள். திக்ர் மற்றும் துஆக்களில் அதிகம் ஈடுபடுங்கள்.அலுவலகப் பணியை வீட்டில் அல்லது பாதுகாப்பான இடத்தில் செய்யுங்கள்.கரோனா தொடர்பான செய்திகளை அதிகம் பார்க்காதீர்கள். அதைப் பற்றியே எப்போதும் பேசாதீர்கள்.சிந்திக்காதீர்கள்.

இறுதியாக இறைவன் மீது பாரத்தை போட்டுவிட்டு ரிலாக்ஸாக இருங்கள்.உடன் இருப்போரையும் ரிலாக்ஸாக வைத்துக்கொள்ளுங்கள்.

ஒளிந்திருந்த குகை வாயிலை எதிரிகள் ஆயுதத்துடன் நெருங்கிவிட்ட நெருக்கடியான நிலையிலும் தோழரிடம் , மூன்றாவதாக நம்முடன் இறைவன் இருக்கிறான் என்று நபிகளார் சொன்ன ஆறுதலை அடிக்கடி நினைத்துக்கொள்ளுங்கள்.

அனைவருக்கும் அவனே போதுமானவன். حسبنا الله ونعم الوكيل

அன்புடன் உங்கள் கான் பாகவி

கிடைத்த ஓய்வு வீண்போகலாமா?

*கிடைத்த ஓய்வு வீண்போகலாமா?*

*அ. முஹம்மது கான் பாகவி*

பொது முடக்கம் என்றும் முழு ஊரடங்கு என்றும் அரசு ஆணை பிறப்பிக்க, நாமெல்லாரும் வீட்டுக்குள் முடங்க வேண்டிய கட்டாயம் நேர்ந்து பல மாதங்களாகிவிட்டன. இது எப்போது முடியும்; விடிவு பிறக்கும் என ஒவ்வொருவரும் ஏங்கித் தவிக்கும் பரிதாபத்தைக் கண்டு நெஞ்சு வெம்பித்தான் போகிறது. எல்லாம் கரோனா கொடுத்த ‘சீர்’கள்.

‘சும்மா’ இருப்பதைப் போன்றதொரு தண்டனை வேறு இருக்காது. நகராமை உயிரின்மையின் அடையாளம் அல்லவா? உயிர் வாழ்கிறோம் என்பதற்குச் சான்றே இயக்கம்தானே! அதுவே நின்றுபோனால், மூச்சு நின்றுவிட்டது என்றுதானே பொருள்! சிலவேளை இது மன அழுத்தத்திற்குக் காரணமாகி மரணத்திற்கே வழிவகுத்தாலும் வியப்பதற்கில்லை.

இப்போது தெரிகிறதா? பணி செய்வதன் அருமை! சரி! விதியை நோகக் கூடாது. ஏன், இதையே நமக்குக் கிடைத்த ஓர் ஓய்வாகக் கருதி, புண்ணியங்கள் தேடிக்கொள்ளக் கூடாது? காலம் கையிலிருக்கும்போது பயன்படுத்தத் தவறினால், பின்னர் கெஞ்சினாலும் கிட்டாது காலத்தின் ஒரு கணம்கூட.

மாணவக் கண்மணிகளே! பள்ளி, கல்லூரி, மத்ரஸா ஆகிய கலைக் கூடங்களில் பயின்றுவரும் நீங்கள், உங்களுக்குக் கிடைத்த ஓய்வு காலத்தை வீணாகக் கழிக்காமல், வினயமாகக் கழித்தால் என்ன என்று யோசித்துப்பாருங்கள்!

முதலில் மத்ரஸாக்களில் கற்ற, அல்லது கற்றுக்கொண்டிருக்கிற மார்க்கக் கல்வியாளர்களுக்குச் சில யோசனைகள்! பரிந்துரைகள்:

1. “கற்றது கைமண் அளவு; கல்லாதது உலகளவு” -என்பார்கள். மத்ரஸா பாடத்திட்டத்தில் இல்லாத, அதே நேரத்தில் நமக்கு மிகவும் இன்றியமையாத நூல்கள் எத்தனையோ உண்டு. அவற்றைக் கண்டுபிடித்து நீங்களே வாசிக்கலாம்! முக்கியக் குறிப்புகளைப் பதிவு செய்துகொள்ளலாம்! தெரிய முடியாததை அருகிலுள்ள அறிஞர்களிடம் கேட்டுத் தெரிந்துகொள்ளலாம்.

இஸ்லாமிய வரலாறு, நபிமார்கள் வரலாறு, நபித்தோழர்கள் வரலாறு, இந்திய வரலாறு, முடிந்தால் உலக வரலாறு, இதிய சாசன சட்டம், இஸ்லாமிய அறிவியல், பொருளியல், அரசியல், சட்டவியல், குடும்பவியல், சமூகவியல், தனிமனித ஒழுக்கவியல், உளவியல், வணிகவியல்... என நிறைய துறைகள் நமக்கு அந்நியமாக உள்ளன.

இவற்றை உங்களால் சுயமாகக் கற்க முடியும் என்பதைவிடக் கற்றாக வேண்டும். அதற்கு இந்த ஓய்வைப் பயன்படுத்துங்கள்.

2. இமாம்களாக இருப்பவர்களுக்கு, ஏன் எல்லா ஆலிம்களுக்கும் ‘தஜ்வீத்’ கலை மிகமிக அவசியமானது. இக்கலைக்காக நேரத்தைச் செலவிட்டுப் பயிற்சியாளர்கள் மூலம் தரமான பயிற்சி பெறலாம்.

3. ஜும்ஆ உரை மட்டுமன்றி, பல்வேறு நிகழ்ச்சிகளில் நாம் உரையாற்ற வேண்டியவர்களாக உள்ளோம். உரைக்குக் குரல் மட்டும் போதாது. மொழியும் தேவை. அத்துடன் காலத்திற்கேற்ற தகவல்களும் தரவுகளும் தேவை. இவற்றைத் தலைப்புகள் வாரியாகத் திரட்டிப் பதிவு செய்துகொண்டால், நம் உரைகள் அர்த்தமுள்ளவையாக அமையும்.

அடுத்து பள்ளி, கல்லூரி மாணவ மாணவியர். வீட்டுக்குள் அடைந்து செல்பேசியைக் கையில் வைத்துக்கொண்டு, எப்போது பார்த்தாலும் இணையத்திலேயே நேரத்தைக் கழிப்பதைக் கைவிடுங்கள்! உங்கள் எதிர்காலத்திற்கு உதவக்கூடிய துணைக் கலைகளைக் கற்றுப் பயிற்சி பெறுவதில் இந்த ஓய்வு நாட்களை உருப்படியாகச் செலவிடுங்கள்.

1. ஆங்கிலம் உள்ளிட்ட மொழிப்பயிற்சி. என்னதான் திறமையாகப் படித்திருந்தாலும், வேலைவாய்ப்புக்கு மிகவும் அவசியமானது மொழியாற்றல். நுழைவுத் தேர்வு அல்லது நேர்காணலில் நீங்கள் வெல்ல வேண்டுமென்றால், மொழித் திறன்தான் முதல்படியாக உள்ளது என்பதை மறந்துவிடாதீர்கள்.

மொழித் திறனை வளர்த்துக்கொள்வதற்கான ஆன்லைன் வகுப்புகள் நடக்கின்றன. அவற்றில் சேர்ந்து, உங்கள் பொன்னான நேரத்தைப் பயனுள்ள வகையில் கழியுங்கள்.

2. கணினிப் பயிற்சி. கணினியில் தட்டச்சுப் பயிற்சி, கணக்குப் பதிவுப் பயிற்சி, செயலிகளை (ஆப்) உருவாக்கி இயக்கும் பயிற்சி என வகைவகையான துறைகள் உள்ளன. இவற்றை நீங்கள் இப்போதே கற்றுக்கெண்டால், பின்னால் துணை நிற்கும்.

கையால் யாரும் எழுதுவதில்லை இப்போதெல்லாம்; எல்லாம் கணினிமயமாகிவிட்டன என்பதை மறவாதீர்!

3. கைத்தொழில் ஏதேனும் ஒன்றைக் கற்கலாம்! வயரிங், ஃபிட்டிங், ரிப்பேரிங்... என ஏராளமான -லாபகரமான- தொழில்கள் எப்போதும் உங்களுக்கு உதவும்.

4. நீங்கள் கல்லூரி அல்லது பள்ளி மாணவர்கள். உங்களால் எத்தனை பேருக்குத் தொழுகைமுறை தெரியும்? குர்ஆன் பார்த்து ஓதத் தெரியும்? சூராக்கள் மனப்பாடமாக ஓதத் தெரியும்? தஸ்பீஹ், திக்ர், துஆக்கள் ஆகியன முறையாகக் கற்றவர்கள் எத்தனை பேர்?

அன்றாட வாழ்க்கையில் பின்பற்ற வேண்டிய சுன்னத்தான நடைமுறைகள், ஹலால் (அனுமதிக்கப்பட்டது), ஹராம் (தடை செய்யப்பட்டது), ஈமான் மற்றும் இஸ்லாம் பற்றிய விளக்கங்கள் போன்ற மார்க்க விஷயங்களைக் கற்றவர்கள் உங்களில் எத்தனை பேர்?

இதையெல்லாம் கற்க இந்த ஊரடங்கை ஏன் நமதாக்கிக்கொள்ளக் கூடாது? அருகிலுள்ள ஆலிம்களைச் சந்தித்து, இதற்கான டியூஷன் நடத்தச் சொல்லுங்கள்! ஆங்கிலமும் கணினியும் தொழில்நுட்பமும் இம்மையில் சோறுபோடும் என்றால், மார்க்கம்தான் மறுமையில் சோறுபோடும் என்பதை மறந்துவிடாதீர்கள்!

மார்க்கக் கல்வியின் நிலை கேள்விக்குறி ஆகலாமா?

மார்க்கக் கல்வியின் நிலை கேள்விக்குறி ஆகலாமா?

அ. முஹம்மது கான் பாகவி

கரோனா பிடியில் இந்தியா சிக்கி மூன்று மாதங்கள் ஆகின்றன. ஆயிரக்கணக்கானோரின் இன்னுயிரைப் பலிகொண்டுவிட்டது. பொருளாதாரத்தில் கோடிக்கணக்கான டாலர்களை விழுங்கிவிட்டது. கல்வி, வேலைவாய்ப்பு, வேளாண்மை, வணிகம், உற்பத்தி, ஏற்றுமதி... என எல்லாத் துறைகளையும் நலிவடையச் செய்துவிட்டது.

ஆன்மிகத்தையும் அது விட்டுவைக்கவில்லை. ஆம்! வழிபாட்டுத் தலங்கள் பல மாதங்களாக மூடிக் கிடக்கின்றன. அங்கே தொழுகை, தியானம், திருமறை ஓதல், திக்ர் செய்தல், நல்லுரை கேட்டல்... என உளத் தூய்மைக்கும் மன ஆறுதலுக்கும் வழிவகுக்கும் அத்துணை அமல்களும் தடைபட்டுப் போயுள்ளன.

மார்க்கக் கலைக் கூடங்கள் கலையிழந்துவிட்டன. உரிய காலத்திற்கு முன்பே கட்டாய விடுமுறை விடப்பட்டு தேர்வுகள் நடத்தாமலும் பட்டமளிப்பு விழாக்கள் நடத்தப்படாமலும் தொங்கலில் விடப்பட்டிருக்கின்றன. அடுத்தக் கல்வி ஆண்டின் நிலையும் தெளிவில்லாமல் இருக்கிறது.

இமாம்கள், ஹாஃபிழ்கள், மக்தப் ஆசிரியர்கள் அரபிக் கல்லூரி பேராசிரியர்கள் ஆகியோரின் நிலை கேள்விக்குறியாக்கப்பட்டிருக்கிறது. சிலர் கட்டாய ஓய்வில் அனுப்பப்பட்டுள்ளனர். பலருக்கு ஊரடங்கு கால ஊதியம், போனஸ் போன்ற பயன்கள் மறுக்கப்பட்டுள்ளன. வேறு இடம் பார்த்துக்கொள்ளுங்கள்; முஅத்தினை வைத்துச் சமாளித்துக்கொள்கிறோம் என்று அனுப்பிவைக்கப்பட்டுள்ளனர். விதிவிலக்கு இருக்கலாம்! நல்ல முறையில் இமாம்களைக் கண்ணியப்படுத்தியவர்கள் பாராட்டுக்குரியவர்கள்.

மற்றொருபுறம் அரபிக் கல்லூரி மாணவர்களின் நிலை, இருதலைக்கொள்ளி எறும்பின் நிலையை நினைவுபடுத்துகிறது. மூன்றாம் ஆண்டு மாணவராக ஒருவர் இருப்பார். அந்த ஆண்டுக்கான பாடங்களை நிறைவு செய்யாமலும், செய்திருந்தாலும் தேர்வு எழுதாமலும் சென்றிருப்பார். அடுத்த ஆண்டு நிலை என்ன; எப்படி என்பதும் தெரியவில்லை.

இந்நிலையில் மாணவர்கள் சிலர், இடைப்பட்ட நாட்களில் குடும்பத் தொழில் அல்லது வேறு தொழிலில் ஈடுபட்டு, அதில் சுவை கண்டிருக்கலாம்! இனியும் அதையே தொடர்ந்தால் என்ன என எண்ணலாம்! அல்லது பள்ளி - கல்லூரியில் சேர்ந்து, விட்ட படிப்பை மீண்டும் தொடர்ந்தால் என்ன என்றுகூட ஆசைப்படலாம்!

ஆக, ஏற்கெனவே மார்க்கப் பணியில் ஈடுபட்டுள்ள ஆலிம்களோ, மார்க்கக் கல்வி பயின்றுவரும் மாணாக்கரோ துறை மாற வாய்ப்பு இல்லாமலில்லை.

இதனால் யாருக்கு இழப்பு? மொத்த சமுதாயத்திற்குத்தான் மெத்த இழப்பு. இந்த விவகாரத்தில் சமுதாயத் தலைவர்களும் சமூக ஆர்வலர்களும் மெத்தனமாக இருக்கலாகாது. ஏற்கெனவே, அரபி மத்ரஸாக்களில் மாணவர்கள் எண்ணிக்கை வெகுவாகக் குறைந்துவரும் காலகட்டத்தில், கரோனாவால் மேலும் மாணவர்களின் வருகை குறைவது பெரும் கேடாக முடியும்.

அவ்வாறே, சமயப் பணியாற்றக்கொண்டிருக்கும் ஆலிம்கள் துறைமாற அனுமதிப்பதும் பெரும் நெருக்கடியை உண்டாக்கும். வடமாநிலத்தவரை வைத்து ஒப்பேற்றிவிடலாம் என்று எண்ணுவோருக்கு ஒரு வார்த்தை, அவர்களால் நம் தாய்மொழியில் உரை நிகழ்த்த முடியாது. நம் குழந்தைகளுக்கு, அவர்கள் புரியும் பாஷையில் மார்க்கத்தைச் சொல்லிக்கொடுக்க முடியாது.

குர்ஆனைக்கூட சரியான உச்சரிப்பில் சொல்லித் தராமல், ஃதால், ளாத், ழாத் போன்ற எழுத்துகளை ஸால், ஜாத்... எனத் தவறாக உச்சரிப்பார்கள். தொழுகையிலும் இதுதான் அவர்களுக்கு வரும். தாய்மொழியின் தாக்கம் நிச்சயமாக அவர்களின் உச்சரிப்பில் தொற்றிக்கொள்ளாமல் இராது.

இறையில்லப் பொறுப்பாளர்களுக்கு ஒரு தார்மிகப் பொறுப்பு உண்டு. உங்கள் பள்ளிவாசலில் பணியாற்றிய இமாம், தம் பணியில் தொடர அனுமதியுங்கள். அதற்கு முன்பாக, விடுபட்ட இடைப்பட்ட மாதங்களுக்கான ஊதியம், போனஸ் போன்ற பலன்களை அவர்களுக்கு மனமார வழங்குங்கள்.

அவ்வாறே, எல்லா அரபிக் கல்லூரி நிர்வாகப் பெருமக்களுக்கும் அன்பானதொரு வேண்டுகோள். தங்கள் கல்லூரி பேராசிரியப் பெருமக்கள், முதல்வர்கள், ஊழியர்கள் அனைவருக்கும் ஊரடங்கு காலத்திற்கான ஊதியம், போனஸ் ஆகிய பலன்களை வழங்கி ஆசுவாசப்படுத்துங்கள்.

உங்கள் கல்லூரியில் பயின்றுவரும் மாணவர்கள், தம் கல்வியைத் தொடர உதவி செய்யுங்கள்; அவர்களில் யாரும் இடைநிறுத்தம் செய்துவிட அனுமதித்துவிடாதீர்கள்.

மேலும், அரபிக் கல்லூரிகளில் பயிலும் மாணவர்கள், கல்வியை இடையில் நிறுத்திவிடாமல் தொடர அவர்களின் பெற்றோர், உற்றார், உறவினர், மஹல்லா ஜமாஅத், ஆலிம்கள் ஒவ்வொருவரும் ஒத்துழையுங்கள்! அம்மாணவர்களைச் சந்தித்து உற்சாகமூட்டி, உதவிகள் செய்து ஆதரவு காட்டுங்கள்!

இந்த நடவடிக்கைகள் மூலம் அனைவரும் சேர்ந்து, மார்க்க அறிஞர்களை ஊக்குவிப்போம். மார்க்கம் கற்கும் மாணவர்களுக்கு ஆதரவுக் கரம் நீட்டுவோம்.

பாரம்பரிய மார்க்க அறிஞர்களின் சேவை தொடர வேண்டும்! இந்த அறிஞர்களை உருவாக்கும் அரபி மத்ரஸாக்களில் மாணவர்கள் தொடர்ந்து சேர வேண்டும்.

இறையில்லங்களில் இறைமறை என்றும் ஒலிக்கட்டும்! மார்க்க உரைகள் எப்போதும் உரக்க முழங்கட்டும்! இந்தப் புண்ணியத்தில் நம் ஒவ்வொருவரின் பங்கும் அணிவகுக்கட்டும்! அல்லாஹ் அனைவருக்கும் அருள் புரியட்டும்!

_____________________

பெருநாள் வாழ்த்துகள்

தீமையிலும் ஒரு நன்மைஉண்டு!

~~~~~~~~~~~~

தீமையிலும் ஒரு நன்மை

உண்டு!

~~~~~~~~~

நான் மாணவனாக இருந்த சமயம் திண்டுக்கல் மாவட்டம் சித்தையன் கோட்டையில் எங்கள் மாணவ நண்பர்களின் ரமளான் பொழுதுகள் இனிமையாகக் கழிந்ததுண்டு.

அருகில் உள்ள புதுப்பட்டி எனும் சிற்றூரில் ஒரு சிறிய மஸ்ஜித். அங்கு ஹாஃபிழ் வைத்து தராவீஹ் நடத்தும் அளவுக்கு வசதியில்லை.நாங்கள் சில மாணவர்கள் சேர்ந்து தராவீஹ் நடத்தும் பொறுப்பை ஏற்றுக் கொண்டோம்.

ரக்அத்களைப் பிரித்துக்கொண்டு இரண்டு அல்லது மூன்று பேர் தொழவைப்போம். அந்த எளிய மக்களுக்கோ ஆனந்தம்.தங்கள் மஹல்லாவிலும் சிறப்புத் தொழுகை நடக்கிறதே!

இப்படி சில ஆண்டுகள்.நானும் இமாமத் செய்தேன் மனநிறைவோடு. அதற்குப் பிறகு இமாமத்திற்கான வாய்ப்பு வாய்க்கவில்லை. நினைவு தெரிந்த காலத்திலிருந்து ஜமாஅத்துடன் தராவீஹ் தொழுவதை விட்டதில்லை. அதில் அவ்வளவு ஓர் ஆனந்தம்; மனநிறைவு.

  இந்த ஆண்டு வந்ததே வைரஸுடன். பேரிடிதான். நினைத்தும் பார்க்கவில்லை. பள்ளியில் தொழமுடியாதென்று. நொந்து போனேன்.

திடீரென ஒரு யோசனை. இல்லத்தில் ஆறு பேர். ஏன் நாமே இமாமாக நின்று ஜமாஅத்தாகத் தொழக்கூடாது? அதையே நடைமுறைப்படுத்திவருகிறேன். மகிழ்ச்சியாக கழிகிறது ரமளான்.

ஆனாலும் என்ன? முழு குர்ஆன் ஓதி தொழமுடியவில்லை. சின்னச் சின்ன சூராதான். இதுவே என்ன கஷ்டமாக இருக்கிறது தொரியுமா?

இப்போதுதான் தெரிகிறது இமாமத் எவ்வளவு பெரிய மகத்தான பணி! அதிலும் ஹாஃபிழ்கள் பாடு எவ்வளவு பெரியது!

எப்படியோ கரோனா தீமையிலும் எனக்கொரு நன்மை!

அன்புடன் உங்கள் கான் பாகவி.

மொழிபெயர்ப்பாளரும் ஒரு படைப்பாளியே

~~~~~~~~~~~~

மொழிபெயர்ப்பாளரும் ஒரு படைப்பாளியே

~~~~~~~~~~~~

பேரா.க.பஞ்சாங்கம்

மொழிபெயர்ப்பும் ஒரு கலையே; மொழிபெயர்ப்பாளரும் ஒரு படைப்பாளியே என்ற கருத்துதான் இன்றைக்கு வலுவாக நிலைப்பெற்றுள்ளது.

       மூல நூலாசிரியரும் , மொழியாலான உலகத்தின் மேல்தான் வினை புரிகிறார்.மொழிபெயர்ப்பாளரும் மொழியாலான உலகத்தின் மேல்தான் வினை புரிகிறார்.

மொழிபெயர்ப்பாளருக்கு மூல நூலாசிரியர் உருவாக்கித்தந்த மொழி உலகம் வெளிப்படையாக முன் நிற்கிறது.மூல ஆசிரியருக்கு அவர் முன்னோர்கள் உருவாக்கித்தந்த மொழி உலகம் மறைவாக நிற்கிறது.அவ்வளவுதான்

வேறுபாடு. எனவே, பெரிதாக இருவருக்கும் இடையில் உயர்வு/தாழ்வு கற்பிக்கப் தேவையில்லை.

ஆக, மொழிபெயர்ப்பு என்பது, சிரமம் என்று கருதினால் சிரமம். அதேநேரத்தில்,ரசித்து இறங்கிவிட்டால் ,அதைப்போல சுவாரஸ்யமான பணி எதுவுமே இருக்க முடியாது.

மொழிபெயர்ப்பாளருக்குப் பன்மொழிப் புலமை இருந்தாக வேண்டும்.அது மட்டுமே மொழிபெயர்ப்பாளராகத் தகுதியா என்றால் அதுவும் இல்லை. மொழி

ஆளுமை வேண்டும். ரசனையும் வேண்டும்.

~~~~~~~~~~~~எங்கள் ஆசிரியர் ஆயங்குடி சாலிஹ் ஹள்ரத் அவர்கள் மறைவு~~~~~~~~~~~~

~~~~~~~~~~~~

எங்கள் ஆசிரியர் ஆயங்குடி சாலிஹ் ஹள்ரத் அவர்கள் மறைவு

~~~~~~~~~~~~

1960களில் கூத்தாநல்லூர் மன்ப உல் உலா அரபிக் கல்லூரியில் எங்களுக்குத் திறம்பட கல்வி கற்பித்த என் மரியாதைக்கும் பாசத்திற்கும் உரிய ஆசிரியப் பெருமகனார் மெளலானா சாலிஹ் ஹள்ரத் அவர்கள் இன்று 02.04.2020 காலை லால்பேட்டையில் மறைந்தார்கள் எனும் செய்தி அறிந்து ஆழ்ந்த வருத்தமும் துக்கமும் அடைந்தேன்.

அன்னார் பொரவாச்சேரி , நெல்லை பேட்டை ஆகிய கல்லூரிகளில் முதல்வராகவும் பணியாற்றியுள்ளார்கள். பின்னர் நீண்ட காலம் மலேஷியாவில் இருந்த ஹள்ரத் அவர்கள் மூப்பின் காரணத்தால் லால்பேட்டையில் தம் இல்லத்தில் ஓய்வு எடுத்துவந்தார்கள்.

சாலிஹ் ஹள்ரத் அவர்களிடம் நான் 3 ஆண்டுகள் கல்வி பயின்றுள்ளேன். பாடங்களை எளிமையாகப் புரியவைப்பதேடன் இறையச்சம், நல்லொழுக்கம் ஆகிய போதனைகளையும் செய்வார்கள். தாயுள்ளம் கொண்ட அந்த மகான் என்மீது தந்தை பாசத்தைப் பொழிவார்கள்.

நான் , கம்பம் பீர் முஹம்மது பாகவி, ஜைனுல் ஆபிதீன் உலவி, எம்.சி. ரோடு அப்துல் ஃபத்தாஹ் உலவி போன்றோர் அன்னாரின் மாணவர்கள். 

ஒரு திருமணத்தில் கலந்துகொள்ள சில ஆண்டுகள் முன் லால்பேட்டை சென்றிரேந்தபோது சாலிஹ் ஹள்ரத் அவர்கள் இல்லம் சென்று அன்னாரைச் சந்தித்தோம். அச்சந்திப்பு எனக்கு மிகவும் ஆறுதலாக இருந்தது.

அண்மையில் ரஹ்மத் பப்ளிகேஷன் வெளியிட்ட தஃப்சீர் இப்னு கஸீர் பத்தாம் பாகத்திற்கு எங்கள் அன்பான வேண்டுகோளை ஏற்று அணிந்துரை வழங்கினார்கள்.ஒரு மாணவனின் எழுத்துக்கு, அவன் ஆசிரியர் வழங்கும் மதிப்புரையைவிட உயர்ந்த விருது வேறு இருக்க முடியாது. ஹள்ரத் அவர்களின் இறுதி நாட்கள் என்பதை உணர்ந்து, இப்போது விட்டால் இனி வாய்ப்பு கிடைக்காது என்ற துடிப்பில் தான் அணிந்துரை வற்புறுத்தி வாங்கினோம்.

கிட்டத்தட்ட என் ஆசிரியர்கள் அனைவரும், அல்லது பெரும்பாலோர் என் எழுத்துத் தொண்டை ஊக்கிவித்து மதிப்புரை வழங்கியது நான் செய்த புண்ணியம் என்பேன்.

ஹள்ரத் அவர்களின் இறுதி நிகழ்வில் கலந்துகொள்ள தந்தான் வேண்டும். ஆனால் நாட்டு நிலைமை இடம் கொடுக்காது. அன்னாரின் மறுமை வாழ்வு செழிக்க அல்லாஹ் அருள் புரிவானாக.

اللهم اغفر له و ارحمه وأدخله جنة الفردوس الأعلى يارب العالمين.

என வேண்டி விடைபெறுகிறேன். வஸ்ஸலாம்.

அன்புடன் உங்கள்

கான் பாகவி

அனைத்து ஆலிம்களும்அவசியம் ஆஜராகுஙகள்

~~~~~~~~~~~~~~~~

அனைத்து ஆலிம்களும்

அவசியம் ஆஜராகுஙகள்

~~~~~~~~~~~~~~~~

இன் ஷா அல்லாஹ் வருகின்ற 14.03.2020 சனிக்கிழமை மாலை 6.00மணிமுதல் 9.00மணிவரை சென்னை மண்ணடி மஸ்ஜித் லஜ்னத்துல் முஹ்சினீன் பள்ளிவாசலில் நடைபெறவுள்ள எங்கள் ஆசிரியர் பெருந்தகை 

மெளலானா பி.எஸ்.பி. ஜைனுல் ஆபிதீன் ஹள்ரத் அவர்களின் சுயசரிதை நூல் வெளியிடப்பட உள்ளது.

அன்னாரே தம் நாவால் சொல்லச் சொல்ல அன்புத் தம்பி மெளலவி கலீலுர் ரஹ்மான் மன்ப ஈ அவர்கள் வாசகம் அமைத்துத் தொகுத்துள்ளார்.

அத்தோடு ஹள்ரத் அவர்களின் என் போன்ற மாணவர்கள் ஹள்ரத் அவர்கள் பற்றி எழுதியுள்ள சுவையான சம்பவங்கள் கொண்ட கட்டுரைகளும் நூலில் இடம்பெறுகின்றன.

நம் காலத்தில் வாழ்ந்துகொண்டிருக்கும் மூத்த ஆலிம் பெருமகனாருக்குப் புகழ் சேர்க்கும் இவ்விழாவில் எல்லா ஆலிம்களும் கலந்துகொண்டு சிறப்பு சேர்ப்பது கடமையல்லவா? 

இன்றைய இளம் ஆலிம்கள் பெரும்பாலும் அன்னாரின் மாணவர்களாக, மாணவர்களின் மாணவர்களாக இருப்பர். இரண்டு மூன்று தலைமுறைகளைக் கண்ட ஹள்ரத் அவர்களின் சுயசரிதை நம் ஒவ்வொருவருக்கும் ஏதேனும் ஒரு வகையில் பாடமாக இருக்கும்.இந்த அரிய வாய்ப்பினை தவறவிடாதீர்கள்.

காலையிலிருந்து தொடங்கும் நிகழ்ச்சிகளில் பல ஆலிம்களுக்காக மட்டுமே ஏற்பாடு செய்யப்பட்டிருப்பது சிறப்பு அம்சமாகும்.

ஒருவர் , அதிலும் மார்க்கத்திற்காகவே தம் வாழ்நாளை அர்ப்பணித்த ஒரு பெருந்தகை வாழ்வில் சந்தித்த மேடு பள்ளங்கள்  இளையவர்களுக்குச் சிறந்த பாடமாக இருக்கும் என்பதில் ஐயமில்லை.

வாருங்கள்! நாமும் வாழ்ந்து பார்ப்போம் !

- உங்கள் அன்பு 

கான் பாகவி

~~~~~~~~~~~~~~~~

*இந்திய முஸ்லிம்களின்* *இரண்டாவது விடுதலைப் போராட்டம்!*

*இந்திய முஸ்லிம்களின்*

*இரண்டாவது விடுதலைப் போராட்டம்!*

*அ. முஹம்மது கான் பாகவி*

இந்தியாவை 800-க்கும் அதிகமான ஆண்டுகள் ஆண்ட பெருமை முஸ்லிம்களுக்கு உண்டு. முஸ்லிம் மன்னர்களின் ஆட்சி நடந்தபோதுதான் இந்தியாவை ஆக்கிரமித்தனர் வெள்ளையர்கள். இந்திய மண்ணில் வெள்ளைக்காரன் கால் பதித்த அடுத்த நிமிடமே மோப்பம் பிடித்துவிட்ட முஸ்லிம் ஆட்சியாளர்கள், அவர்களை விரட்டியடிக்க ஆயத்தமாகிவிட்டார்கள் என்பது வரலாறு.

பின்னர் தனிப்பட்ட முறையிலும் மற்ற சமூகங்களுடன் இணைந்தும் ஆக்ரோஷமாகவும் ஆண்மையோடும் ‘வெள்ளையனே வெளியேறு’ இயக்கத்தைக் கையிலெடுத்து, உயிர்கொடுத்துப் போராடினார்கள் முஸ்லிம்கள். பல முஸ்லிம் மன்னர்கள் குடும்பத்தோடு வீரமரணம் அடைந்தனர். சிலர் சொத்துகளை இழந்தனர். மார்க்கம் கற்ற ஆலிம் பெருமக்கள் ஆயிரக்கணக்கில் வெள்ளையர்களால் கழுவேற்றப்பட்டார்கள்.

சுதந்திரம் கிடைத்தது. அப்போதைய தலைவர்களான காந்திஜி, ஜின்னா, பட்டேல் போன்றவர்களால் ஆலோசித்து முடிவெடுக்கப்பட்டபடி நாட்டுப் பிரிவினையும் நடந்தது. விரும்பக்கூடிய யாரும் பாகிஸ்தான் பகுதிக்குச் சென்று குடியேறிக்கொள்ளலாம் எனப் பொது அறிவிப்பு வெளியானது. இன்றைய பாகிஸ்தான் மற்றும் அதையொட்டி வாழ்ந்த இந்துக்கள், சீக்கியர்கள், பார்சிகள் முதலான முஸ்லிமல்லாதோரும் குடிபெயர்ந்தனர்.

ஆனால், வடக்கிலும் சரி! தெற்கிலும் சரி! பலகோடி முஸ்லிம்கள் இந்தியாதான் எங்கள் பிறந்த மண்; இதுவே எங்கள் இறந்த மண்ணாகவும் இருக்க வேண்டும் –என்று தீர்மானித்து, பாகிஸ்தான் குடிபெயர மறுத்துவிட்டனர். இந்தியாவே எங்கள் முன்னோர்கள் பிறந்த நாடு என்று சொல்லி, இங்கேயே தங்கி, இந்தியாவின் இன்ப – துன்பங்களில் சமபங்கு எடுத்துக்கொண்டு வாழ்ந்துவருகின்றனர்.

இதற்கிடையில், கிழக்கு பாகிஸ்தானில் வெடித்த உள்நாட்டுப் போரில் இந்தியா தலையிட்டு, பாகிஸ்தானிலிருந்து வங்கதேசம் உருவாக வழிவகுத்தது. பாகிஸ்தான் இரண்டானது. இந்நிலையில், பாகிஸ்தானிலும் வங்கதேசத்திலும் குடியேறிய இந்தியர்கள் பலர். சாதி-மத வேறுபாடின்றி இந்தியாவுக்குக் குடிபெயர்ந்தனர். அங்குள்ள வாழ்க்கைத் தரம், தட்ப வெப்பநிலை, பொருளாதார நெருக்கடி ஆகியவை இதற்குக் காரணங்களாக அமைந்தன.

‘முஸ்லிம் நாடு’ என்று பெயரளவிற்குப் பெயர் சூட்டிக்கொண்ட அவ்விரு நாடுகளின் மதரீதியிலான சில நடவடிக்கைகள் பொருந்தாமல் போனதும், முஸ்லிமல்லாதோரின் வெளியேற்றத்திற்குத் தூண்டுகோலாக அமைந்திருக்கக்கூடும். ஆனால், மதம் மட்டுமே காரணம் என்றால், அந்நாடுகளின் முஸ்லிம்களும் அகதிகளாக இந்தியா வந்து, குடியுரிமை இல்லாமல் ஏன் அவதிப்பட வேண்டும்.

பொருளாதாரம், சுகாதாரம், வேலைவாய்ப்பு, கல்வி ஆகிய துறைகளில் அந்நாடுகளில் ஏற்பட்ட போதாமைதான் இவர்கள் குடிபெயர உண்மையான, சரியான காரணமாக இருக்க இயலும். இவ்வாறு இந்தியாவுக்குள் தகுந்த ஆவணங்களின்றி, கையில் கிடைத்ததை எடுத்துக்கொண்டு, பரிதாப நிலையில் அந்நாட்டைச் சேர்ந்த இலட்சக்கணக்கானோர் படிப்படியாகக் குடியேறினர். அஸ்ஸாம், மேற்குவங்கம் போன்ற மாநிலங்களில் வசதிவாய்ப்பிற்கேற்ப உள்ளே புகுந்தோரில் சில லட்சம் முஸ்லிம்களும் அடங்குவர்.

உள்ளூரில் வாழ்ந்துவந்த மக்களுக்கு இவர்களின் வரவால் பல்வேறு நெருக்கடி ஏற்படவே, அகதிகளை வெளியேற்ற வேண்டும் என்று அவர்கள் போராடத் தொடங்கிவிட்டார்கள். குறிப்பாக, இது அஸ்ஸாமில் சற்று கடுமையாகவே இருந்துவருகிறது. நடுவண் அரசு தலையிட்டு, இதற்கொரு தீர்வு காண முயலும்போது, அகதிகளில் அதிகமானோர் இந்துக்களாக இருப்பது கணக்கெடுப்பில் தெரியவந்தது.

நீண்டகாலம் அகதிகளாக இருக்கும் முஸ்லிமல்லாதோரை மட்டும் ‘இந்தியர்கள்’ எனச் சட்டப்படி அறிவிக்க பா.ஜ.க. அரசு எண்ணியது. (அப்படிப் பார்த்தால், அனைவரும் இந்தியர்தான்.) முஸ்லிமல்லாத அகதிகளுக்கு மட்டும் குடியுரிமை வழங்குவதென்றும் சில லட்சம் முஸ்லிம் அகதிகளை நாட்டைவிட்டுத் துரத்துவது என்றும் முடிவு செய்தது பாஜக.

இந்தியக் குடியுரிமை பெறும் முஸ்லிமல்லா அகதிகள், நன்றிக் கடனாகத் தங்களுக்குத் தேர்தல்களில் வாக்களிப்பார்கள். முஸ்லிம் அகதிகள் நமக்கு வாக்களிக்கமாட்டார்கள். அத்துடன், பாரதத்தில் முஸ்லிம்கள் எண்ணிக்கை அதிகமாகி, ஆட்சியைப் பிடித்துவிடுவார்கள் –என்பதே இந்த பாரபட்ச முடிவுக்கு அசல் காரணம் என்றால், பாஜகவின் மனசாட்சி மறுக்காது.

ஆனால், அஸ்ஸாமியர் அகதிகள் அனைவரையும் –சாதிமத பேதம் பார்க்காமல்- நாட்டிலிருந்து வெளியேற்றியாக வேண்டும் எனப் போராட்டம் நடத்திக்கொண்டிருக்கிறார்கள்.

இது ஒரு பக்கம் இருக்க, இதையொட்டியே இந்தியா முழுக்க வாழும் முஸ்லிம்கள் அனைவரையும் கணக்கெடுத்து, அரசு கோரும் சாத்தியமில்லா ஆவணங்கள் இல்லாததால் ‘சந்தேகத்துக்குரியோர்’ என முத்திரை குத்திக் கணிசமானோரை அகதிகளாக்க நடுவண் அரசு திட்டமிட்டது. இதன் விளைவே, இந்தியக் குடியுரிமைத் திருத்தச் சட்டம் உள்ளிட்ட சட்டங்கள்.

ஆனால், இதன் அபாயத்தை அறிந்துகொண்ட இந்திய முஸ்லிம்கள் மதச்சார்பற்ற சக்திகளுடன் இணைந்து காஷ்மீர் முதல் கன்னியாகுமரிவரை வீரியமிக்கப் போராட்டங்களைக் கையிலெடுத்துத் தொடர்ந்து நடத்திவருகிறார்கள். தலைநகர் தில்லியில் தொடங்கிய ‘ஷாஹின் பாஃக்’ காத்திருப்புப் போராட்டம், சென்னை வண்ணாரப்பேட்டைவரை பரவி, இந்திய வீராங்கனைகளால் தொடர்ந்து நடந்துவருகிறது.

பர்தா முறையைப் பேணி, உணவை மறந்து, உறக்கத்தைத் துறந்து, இயற்கைத் தேவைகளைக்கூடத் தள்ளிவைத்துவிட்டுக் கைக்குழந்தைகளுடன் அந்த வீரப் பெண்கள் மேற்கொண்டுவரும் போராட்டத்தைக் காண்கையில் நமக்கெல்லாம் சிலிர்த்துப்போகிறது. நம்மையும் அறியாமலேயே அவர்களுக்காக துஆ செய்யத் தூண்டுகிறது. காவலர்களின் தடியடியையும் வாங்கிக்கொண்டு, அதை ஒரு விழுப்புண்ணாக ஏற்றுக்கொண்டு உறுதியோடு போராடும் வீரமங்கையர் வாழ்த்துக்குரியவர்கள்; வரலாற்றுச் சின்னங்கள்.

இதே காத்திருப்புப் போராட்டம் தமிழகத்தில் பத்துக்கும் மேற்பட்ட ஊர்களில் மகளிரால் நடத்தப்படுவது வியப்பானது; வித்தியாசமானது. அத்துடன் மறியல் போராட்டங்கள், மனிதச் சங்கிலி போராட்டங்கள், முற்றுகைப் போராட்டங்கள், கண்டனக் கூட்டங்கள் மற்றும் ஆர்ப்பாட்டங்கள்… என மக்களாட்சியில் அனுமதிக்கப்பட்டுள்ள அனைத்து வகையான சாத்வீகப் போராட்டங்களையும் சமுதாயம் முன்னெடுத்துவருவது, அதன் விழிப்புணர்வைக் காட்டுகிறது.

இத்தனைக்கும், அசம்பாவிதங்களுக்கு இடமளிக்காமல், சட்டமீறல்களில் ஈடுபடாமல், காவல்துறைப் பாதுகாப்போடு அறவழியில் இப்போராட்டங்கள் நடப்பது பார்ப்போரை வியக்கவைக்கிறது. காவலர்களின் அத்துமீறலால் சிற்சில இடங்களில் நடந்த தள்ளுமுள்ளுகள், தடியடிகள் தவிர வேறு விபரீதங்கள் எதற்கும் போராளிகள் இடமளிக்காததும் நம் தரப்பைப் பொதுமக்கள் அங்கீகரிக்க வழிவகுத்துள்ளது. அல்ஹம்து லில்லாஹ்.

போராட்டங்கள் நடந்தாலும், சம்பந்தப்பட்ட ஆட்சியாளர்கள், அதிகாரிகள், முதலமைச்சர், குடியரசுத் தலைவர்… என அதிகார வர்க்கத்தை முறையாகச் சந்தித்து, நம் அச்சங்களையும் கோரிக்கைகளையும் முறையிட்டு நடவடிக்கை எடுப்பதற்கான முயற்சிகளையும் சமுதாயப் பெரியவர்கள் மேற்கொண்டிருப்பது பாராட்டுக்குரியது.

எல்லாம்சரி! இது எத்தனை நாட்களுக்கு…? அரசு அசைந்து கொடுக்குமா…? கடைசியில் நம் நிலைதான் என்ன…? என்ற கேள்விகள் நம்முன் அணிவகுப்பதை நிராகரிக்க முடியவில்லை.

ஒன்றை மட்டும் உறதியாகச் சொல்லிக்கொள்வோம்! முயற்சி நம்முடையது; அதில் அயர்ச்சி கூடாதது; நகர்ச்சி இறைவனுடையது; அந்த நம்பிக்கையில் தளர்ச்சி வரக்கூடாதது.

ஏன் நம் அடுத்த திட்டங்கள் இப்படி இருக்கக் கூடாது? 1. கணக்கெடுப்பில் ஒத்துழையாமை. 2. ஒவ்வொருவரும் பாஸ்போர்ட் (கடவுச் சீட்டு)–உம்ரா / ஹஜ் பெயரில்கூட- எடுத்துவைத்துக்கொள்ளல். 3. நீதிமன்றத்தில் வழக்குத் தொடுத்தல் 4. சர்வதேச மனித உரிமைகள் மன்றத்தின் கவனத்திற்குக் கொண்டுசெல்லல். 5. இந்தியாவின் நட்பு நாட்டுத் தலைவர்களை அணுகுதல்.

எல்லாவற்றுக்கும் முன்னால் படைத்த இறைவனிடம் அழுது மன்றாடி முறையிட்டுக்கொண்டே இருத்தல். அப்போது நம்முடைய இரண்டாவது விடுதலைப் போராட்டமும் இன் ஷா அல்லாஹ் வெல்லும்.

___________________________

வரிச்சலுகை உண்மையா?

∆∆∆∆∆∆∆∆∆∆∆∆∆∆∆∆∆

வரிச்சலுகை உண்மையா?

∆∆∆∆∆∆∆∆∆∆∆∆∆∆∆∆∆

பாஜக அரசு பட்ஜெட்டில் அறிவிக்கப்பட்டுள்ள வரிச்சலுகைகள் ஒரு பொய்த்தோற்றம் ஆகும்.காரணம், புதிய வரி விதிப்பின்படி உட்சபட்ச சேமிப்பு ரூ.62,400தான்.

ஆனால் பழைய வரிவிதிப்பின்படி உச்சபடசமாக 80-சி பிரிவின் கீழ் சுமார் ரூ.4லட்சம்வரை முதலீடு காட்டி சலுகை பெற முடியும்.

அப்படிப் பார்க்கும்போது பழைய வரியே மேல் என்கின்றனர் மாதாந்திர ஊதியம் பெறுவோர்.இதை உறுத்திப்படுத்துகிற வகையிலேயே நிதி அமைச்சரின் இன்னொரு அறிக்கை அமைந்துள்ளது.

புதிய முறைப்படி பல்வேறு வரிவிலக்குகள் மற்றும் சலுகைகள் பெற முடியாது என அமைச்சர் திட்டவட்டமாக அறிவித்துள்ளார்.அத்துடன்,இந்த இரு வரிவிதிப்பு முறைகளில் எதை வேண்டுமானாலும் ஒருவர் தேர்ந்தெடுக்கலாம் என்ற அறிவிப்பும் செய்யப்பட்டுள்ளது.

இரண்டும் அரசுக்குச் சாதகம்தான் என்று இல்லாவிட்டால் இப்படி அறிவிப்பாரா நிதி அமைச்சர்.

ஆயுள் காப்பீடு பிரீமியம்,வருங்கால வைப்பு நிதி,வங்கி டெபாசிட் , குழந்தைகளின் கல்விக் கட்டணம் உள்ளிட்ட ரூ.1.5லட்சம்வரையிலான சலுகை புதியதில் கிடைக்காது. 

வீட்டுக்கடனுக்கான ஊக்கத்தொகை -ரூ.2லட்சம்,வீட்டு வாடகை,மருத்துவக் காப்பீடு, நிலைக்கழிவு ( டிஸ்கவுண்ட்) -ரூ.50 ஆயிரம் ஆகிய வரிச் சலுகைகளையும் புதிய முறையில் பெற முடியாது.

இப்போது சொல்லுங்கள்: இது சலுகையா? தந்திரமா ?

- அன்புடன் உங்கள்

கான் பாகவி

பிரஸ்டன் கல்லூரி கல்விக் கருத்தரங்கு

∆∆∆∆∆∆∆∆∆∆∆∆

பிரஸ்டன் கல்லூரி

          கல்விக்

    கருத்தரங்கு

∆∆∆∆∆∆∆∆∆∆∆∆

*பிரஸ்டன் பன்னாட்டுக் கல்லூரி, சென்னை நடத்தும்

ஒருநாள் கல்விக் கருத்தரங்கம்*

நாள்: *11.01.2020 சனிக்கிழமை* காலை 9.00 மணிமுதல் மாலை 6.00 மணிவரை

இடம்: *முத்தமிழ் பேரவை, T.N. ராஜரத்தினம் கலையரங்கம்,* துர்காபாய் தேஷ்முக் சாலை, (டாக்டர் எம்.ஜி.ஆர். ஜானகி மகளிர் கலை, அறிவியல் கல்லூரி எதிரில்) ராஜா அண்ணாமலைபுரம், சென்னை – 28

கருத்தரங்கப் பொருள்:

*இந்தியாவில் சமூக நல்லிணக்கம்

வரலாறு, சவால்கள், தீர்வுகள்*

*கருத்தரங்கத் தொடக்க நிகழ்ச்சி:*

காலை 09.00 முதல் 10.00வரை

தலைவர்: *முனைவர், ராம் புன்யானி* (மனித உரிமை ஆர்வலர்)

நிகழ்ச்சித் தொகுப்பாளர்: முஹம்மது உமர் சுலைமான் (D.O)

திருமறை: ஷைக், அப்துல் வஹீத் உமரி

வரவேற்புரை: முனைவர், T. அமீன் அஹ்மத் உமரி, மதனி

நிகழ்ச்சி அறிமுகம்: முனைவர், S. அப்துல் மாலிக்

தலைமையுரை: தலைவர்

நன்றியுரை: ஷைக், இஹ்த்திஷாமுல் ஹக் காஸிமி

*முதலாம் அமர்வு:*

முற்பகல் 10.15 முதல் 11.30வரை

தலைவர்: *முனைவர், முஹம்மத் சுலைமான் உமரி*

நிகழ்ச்சித் தொகுப்பாளர்: முனைவர், K. அஹ்மத் ஸுபைர்

*கட்டுரையாளர்கள் (ஆங்கிலம்)*

1. சகோதரர் இம்தியாஸ் (முகலாயர்கள் தொடர்பான புனைவுகள்)

2. முனைவர், T. ஷஃபீக் அஹ்மத் (சமூக நல்லிணக்கத்தில் கர்நாடக நவாப்)

3. முனைவர், K. அஹ்மத் ஸுபைர் (அபுல்கலாம் ஆஸாத் – புறக்கணிக்கப்படும் தொலைநோக்குப் பார்வையாளர்)

4. ஷைக், தாரிகுல் ஹக் மதனி (அவுரங்ஸீபின் ஆட்சியில் இந்தியா)

5. முனைவர், J. ராஜா ஹுசைன் (தமிழகத்து மத நல்லிணக்கப் பூங்காவில் முஸ்லிம்கள்)

6. முனைவர், கா. சுகந்தி (திப்பு சுல்தான் மனித விழுமியங்களைப் பாதுகாத்தவர்)

*இரண்டாம் அமர்வு:*

முற்பகல் 11.45 முதல் பிற்பகல் 01.00வரை

தலைவர்: *மௌலானா, அ. முஹம்மத் கான் பாகவி*

நிகழ்ச்சித் தொகுப்பாளர்: மௌலவி, சா. யூசுப் சித்தீக் மிஸ்பாஹி

*கட்டுரையாளர்கள் (தமிழ் மற்றும் ஆங்கிலம்)*

1. மௌலவி, முஹம்மது அலி ஜின்னா சிராஜி (இந்தியாவில் இந்து முஸ்லிம் ஒற்றுமை)

2. மௌலவி, ஹுசைன் ரஷாதி (அடிப்படைவாதம்)

3. சகோதரர் ஷமீம் (சமூக நலனுக்கான நோக்கங்களும் அவற்றை வெற்றி கொள்வதும்)

4. முனைவர், T. அமீன் அஹ்மத் (சமூக நல்லிணக்கம் – தடைகள் என்ன?)

5. மௌலானா, இப்ராஹீம் பாகவி (சமூக நல்லிணக்கத்தைப் பேணுவதில் முஸ்லிம் ஆட்சியாளர்களின் பங்கு)

5. எஸ். தமீம் (சமூக நலனுக்கான நோக்கங்களும் அவற்றை வெற்றி கொள்வதும்)

*மூன்றாம் அமர்வு:*

பிற்பகல் 02.00 முதல் பிற்பகல் 03.00வரை

தலைவர்: *முனைவர், R.K. நூர் முஹம்மத் மதனி*

நிகழ்ச்சித் தொகுப்பாளர்: ஷைக், தாரிகுல் ஹக் மதனி

*கட்டுரையாளர்கள் (ஆங்கிலம் மற்றும் தமிழ்)*

1. மௌலவி, அப்துர் ரஹ்மான் உமரி (தேசியவாதம் எனும் குறுகிய சிந்தனை)

2. ராழியா ஹஃப்ஸா (சமூக நல்லிணக்கத்தில் பெண்களின் பங்கு)

3. மௌலவி, சா. யூசுப் சித்தீக் மிஸ்பாஹி (மறக்கடிக்கப்படும் மாவீரர் திப்பு சுல்தான்)

4. முஹம்மத் உமர் சுலைமான் (வழிபாடு என்பதன் பரந்த, விரிவான பார்வை)

5. மௌலானா, அ. முஹம்மத் கான் பாகவி (அடிப்படைவாதமும் தீவிரவாதமும்)

6. மௌலவி, கவுஸ் கான் உமரி (நபியவர்களின் மதீனா வாழ்க்கையில் சமூக நல்லிணக்கத்திற்கான வழிகாட்டல்கள்)

*நான்காம் அமர்வு:*

பிற்பகல் 03.15 முதல் மாலை 04.00வரை

தலைவர்: *முனைவர், சயீத், பெங்களூரு*

நிகழ்ச்சித் தொகுப்பாளர்: சகோதரர் நிஸார் அஹ்மத்

*கட்டுரையாளர்கள் (ஆங்கிலம்)*

1. இஸ்மா பானு (முன்மாதிரி மனிதர்களின் பற்றாக்குறை)

2. சகோதரர் ஷாஹ்பாஸ் (அடுத்த தலைமுறையின் முன்மாதிரி)

3. ஷைக், அப்துல் வஹீத் (தவறாக வழிநடத்தப்படும் இளைஞர்கள்)

4. ஷைக், ஜுனைத் அஹ்மத் (சமூக நல்லிணக்கத்தில் கல்வியின் பங்கு)

5. முனைவர், R.K. நூர் முஹம்மத் மதனி (ஒருங்கிணைந்து வாழ்வதன் அடிப்படைகள்)

*நிறைவு நிகழ்ச்சி:*

மாலை 04.35 முதல் மாலை 05.50வரை

தலைவர்: *ஜனாப், அஹ்மத் மீரான்*

நிகழ்ச்சித் தொகுப்பாளர்: சகோதரர் அஸீஸுர் ரஹ்மான்

*சிறப்புரைகள்*

*1. ஜனாப், அஹ்மத் மீரான்*

*2. முனைவர், P.S. சய்யித் மஸ்ஊத் ஜமாலி*

*3. முனைவர், M.H. ஜவாஹிருல்லாஹ்*

*4. சகோதரர், ஜிஃப்ரி காசிம் (கருத்தரங்க அறிக்கை மற்றும் நன்றியுரை)*

*முக்கியமான நேரத்தில் அவசியமான தலைப்பில் நடைபெறும் இந்தக் கல்விக் கருத்தரங்கில் சமூக அக்கறை கொண்ட மார்க்க அறிஞர்கள், பேராசிரியர்கள், சமூக ஆர்வலர்கள், மாணவர்கள் ஆகியோர் கலந்துகொள்ளுங்கள்.*

அனைவருக்கும் நன்றி

∆∆∆∆∆∆∆∆∆∆∆∆∆∆∆∆
அனைவருக்கும் நன்றி
∆∆∆∆∆∆∆∆∆∆∆∆∆∆∆∆

என் இரு கண்களிலும் ஏற்பட்டிருந்த கடினமான புரைகள் அறுவை சிகிச்சை மூலம் அகற்றப்பட்டு, பரிபூரண குணம் கிடைத்து இறையருளால் முழுப் பார்வையும் கிடைத்துள்ளது. அல்ஹம்துலில்லாஹ்.

தொடர்ந்து சில வாரங்களுக்கு மெடிஸன் கையாள வேண்டும். இன் ஷா அல்லாஹ் நாளை ( 23.09.2019 ) முதல் அலுவலகப் பணிக்குத் திரும்பிவிட்டேன். விழிகளுக்கு அதிகச் சுமை கொடுக்கக் கூடாது என்பது மருத்துவர் அறிவுரை.

என் கண் நலத்திற்காகவும் மார்க்கப் பணி தொடர்வதற்காகவும் பிரார்த்தித்த அனைத்து நல்லிதயங்களுக்கும் என் இதயங்கனிந்த நன்றியைத் தெரிவித்துக் கொள்கிறேன். இறைவன் அதற்கான கூலியை உங்கள் அனைவருக்கும் வழங்கட்டும்.! வஸ்ஸலாம்.
++++++++++++ உங்கள் அன்பு கான் பாகவி.

# மொழிபெயர்ப்பில் முதன்மையான அக்கறை எதில் ? #

# மொழிபெயர்ப்பில் முதன்மையான அக்கறை எதில் ? #
**************************
---- வெ. ‌ராம்
0 ஒரு வாக்கியத்தைப் புரிந்து கொள்வதோ கதையைப் புரிந்துகொள்வதோ மட்டும் இலக்கியமல்ல. சொல்லாடல் ,உள்வாங்கிக்கொள்ளும் மொழியின் அமைப்பு,தொனி இவற்றிலெல்லாம் என் முதன்மையான அக்கறை இருக்கும்.வாக்கியங்களை உடைத்தாலும் அதன் தன்மை மாறாது என்றால் மட்டுமே உடைத்துக்கொள்வேன்.இல்லையேல் அதை அப்படியே மொழிபெயர்ப்பதுதான் சரி.

எது மொழிக்கு இயல்பாக இருக்கிறது;எது இயல்பாக இல்லை என்பதைக் கவனிக்க வேண்டும்.
மொழிபெயர்ப்பானது சொற்களை மட்டுமே சார்ந்திருப்பதில்லை.எனவே பிரெஞ்சு கருத்தாக்கத்துக்கும் பண்பாட்டு அம்சத்துக்கும் தமிழில் சரியான சொல் இல்லை எனும்போது , அங்கிருந்து அந்தச் சொல்லைக் கடன் வாங்கிக்கொள்ளலாம். ஒருவேளை ஏதேனும் வார்த்தைப் பயன்பாட்டால் பொருள் திரிவதாகத்  தோன்றினால்,அடிக்குறிப்புகள் கொடுத்து விடுவோம்.ஒரு வாக்கியம் சரியாக வர வேண்டும் என்பதற்காக இரண்டு மணிநேரம் கூட நண்பர்களுடன் உரையாடியிருக்கிறோம்.
முறையாகக் கலந்தாலோசிப்பதன் மூலம் மொழிபெயர்ப்பின் தன்மை வளம்பெறுகிறது.

  ( நன்றி: இந்து தமிழ் )

தியாகமே வாழ்க்கையாய் தினந்தோறும்

**************************
தியாகமே வாழ்க்கையாய் தினந்தோறும்
**************************
# ஏக இறைக் கோட்பாட்டாளர்களின் தந்தையான இறைத்தூதர் இப்ராஹீம் (அலை) அவர்களின் தியாகத்தை வர்ணிக்க வார்த்தைகள் இல்லை.

அன்னாரின் பிள்ளைகளான நம்மவர் வாழ்க்கையும் தினமும் தியாகத்தையே நினைவைட்டுகிறது.

இறையன்பைப் பெற,இறைச் சட்டத்தைப் பின்பற்ற, 'இறையடியான்' எனும் அடையாளத்தைக் காப்பாற்ற, இறைமறையைக் கற்க - கற்பிக்க ஒவ்வொரு நாளும் இங்கே நாம் போராட வேண்டியுள்ளது; உழைப்பை மட்டுமல்ல; உதிரத்தையும் சிந்த வேண்டியுள்ளது.

இது எதுவரை நீடிக்கும் என்று தெரியவில்லை.ஆனால் , எத்துணை நாளாயினும் தியாகங்கள் பல செய்து உரிமைகளை வென்றெடுப்போம் எனத் தியாகத் திருநாளாம் இந்நன்னாளில் சங்கல்பம் ஏகற்போம்.அதற்கான உறுதியை வல்லோன் அல்லாஹ் நம் அனைவருக்கும் நல்கிடுவானாக என்ற துஆவையே பெருநாள் வாழ்த்தாகத் தெரிவித்துக் கொள்கிறேன். ஈத் முபாரக்.

- அன்புடன் உங்கள்
 அ.மு.கான் பாகவி.

+++++++++++++++++++

இறக்கும் வயதன்று; ஆனாலும்...

இறக்கும் வயதன்று; ஆனாலும்...
+++++++++++++++++++
சைதங்கநல்லூர் அரபிக் கல்லூரி நிறுவனரும் தாய்க்கல்லூரி பாகியாத்தின்  முன்னாள் ஆசிரியருமான மெளலானா ஆதம் முஹ்யித்தீன் ஃபாஸில் பாகவி அவர்கள் மறைவு செய்தி கேட்டுத் திடுக்குற்றேன்.

ஆலிம் பப்ளிகேஷன்ஸ் மெளலானா யூசுஃப் சித்தீக் மிஸ்பாஹி அவர்கள் ஆதம் ஹழ்ரத் அவர்களின் உடல் நிலை குறித்து சில தினங்களுக்கு முன்பு தான் விரிவாகத் தெரிவித்திருந்தார். இருந்தாலும் மவ்த் அளவுக்கு எண்ணத் தோன்றவில்லை. வயது அதற்கு இடம் கொடுக்கவில்லை.சர்க்கரை நோய்க்கப்பால் வேறு ஏதோ நோய் பாதித்திருக்க வேண்டும்.

எப்படியானாலும் திறமை வாய்ந்த ஓர் நல்லாசிரியர் நம்மை விட்டுப் பிரிந்து விட்டார்.எப்போதும் சிரித்த முகத்துடன் காட்சியளிக்கும் ஆதம் ஹழ்ரத் , மாணவர்களிடம் பரிவோடு நடந்துகொள்ளும் பண்பாளர்.பாடத்தில் திறமைசாலி. இலங்கை மத்ரஸாவில் பணிபுரிந்தவர்.தம் சொந்த மண்ணில் சொந்தமாக மத்ரஸா உருவாக்கி நடத்திவந்தவர்.

மன்திக் (லாஜிக்),ஃபல்ஸஃபா ( கிரேக்கத் தத்துவம்), ஃபலக் (வானவியல்) ஆகிய கலைகளில் தனி ஆர்வம் கொண்டவர். ஃபிக்ஹில் ஒரு நூல் எழுதியவர்.

இப்படி திறமையான மார்க்க அறிஞர்கள் ஒருவர் பின் ஒருவராக மறைந்து கொண்டிருப்பது சமுதாயத்திற்குப் பேரிழப்பாகும்.இழப்பை ஈடு செய்யத்தான் ஆளில்லை. இறைவன் காக்க வேண்டும்.

எஞ்சியிருப்போர் தம் வாழ்நாளைப் பயனுள்ள வழியில் செலவிட வேண்டும் என்பதையே இத்தகைய மரணங்கள் நமக்கு உணர்த்துகின்றன.

மறைந்த வரின் பிழைகளை மன்னித்து மறுமை வாழ்வை வசந்தமானதாக ஆக்கி இறைவன் அருள் புரிவானாக. ஆமீன்.

ஏக்கத்துடன் கான் பாகவி.

ஆலிம் பப்ளிகேஷன்ஸ் பணி துவக்கம்

ஆலிம் பப்ளிகேஷன்ஸ் பணி துவக்கம்
மௌலவி, அ. மு. கான் பாகவி
இறைவனின் மாபெரும் அருளால், சென்னை திருவல்லிக்கேணியில் அமைந்துள்ள ஆலிம் பப்ளிகேஷன்ஸ் அலுவலகத்தில் மொழிபெயர்ப்புப் பணி கடந்த 03.07.2019 புதன் கிழமை அன்று தொடங்கியது.
உலகப் பிரசித்தி பெற்ற மாபெரும் நபிமொழித் தொகுப்பான முஸ்னது அஹ்மத் தமிழாக்கப் பணியை, ஆலிம் பப்ளிகேஷன்ஸ் மொழிபெயர்ப்பாளர் குழுவினர் ஆரம்பித்தனர். இதன் மூல மொழியான அரபியிலேயே 12 பாகங்களைக் கொண்ட இப்பெரு நூலில், 14 அத்தியாயங்கள், 1306 பாடங்கள், 26,363 நபிமொழிகள் இடம்பெறுகின்றன.
ஹதீஸ் அறிவிப்பாளர் பெயர்கள் வரிசையில் பாடத் தலைப்புகள் அமைந்துள்ள இந்நூலில், அவரவர் அறிவித்துள்ள நபிமொழிகள் அனைத்தும் அந்தந்தப் பாடங்களில் இடம்பெறும். உதாரணமாக, ‘சொர்க்க நற்செய்தி சொல்லப்பட்ட நபித்தோழர்கள் அறிவித்தவை’ எனும் முதலாவது அத்தியாயத்தின் முதல் பாடத்தில் அபூபக்ர் (ரலி) அவர்கள் அறிவிக்கும் 77 ஹதீஸ்கள் இடம்பெறுகின்றன.
மொழிபெயர்ப்பாளர் குழுவில் மேலாய்வாளராகப் பணியாற்றும் பேராசிரியர், அ. முஹம்மது கான் பாகவி, மொழிபெயர்ப்பாளர்களான மௌலவி, சா. யூசுப் சித்தீக் மிஸ்பாஹி M.A., M.Phil., மௌலவி, எஸ். அப்துல்லாஹ் பாகவி M.A., M.Phil., நூல் வடிவமைப்பாளரான அ. ஹைதர் அலி, கணக்கரான மௌலவி, A. முஹம்மது ஆஷிக் பாகவி ஆகியோர் இடம்பெறுகின்றனர்.
ஆலிம் பப்ளிகேஷன்ஸ் நிர்வாகக் குழுவில், புரொஃபஷனல் கூரியர், மேனேஜிங் டைரக்டர், S. அஹ்மத் மீரான், தைசீர் கன்சல்டன்சி சேர்மேன், S. இப்னு சஊத், அல்ஹரமைன் டிரஸ்ட், S. முஹம்மது ரஃபி, கம்மி எக்ஸ்போ லிங்க்ஸ், மேனேஜிங் டைரக்டர், உடன்குடி M. முஹம்மது யூசுஃப், டிரிப்பிள் எம் சேர்மேன், முஹம்மது இப்ராஹீம் ஆகியோர் உள்ளனர். ஒருங்கிணைப்பாளர்களாக சிராங்கூன் டிராவல்ஸ் மேலாளர், மௌலவி, முஜீபுர் ரஹ்மான் உமரீ, ஹெர்ட்ஸ்மென் எஸ்டேட்ஸ், டைரக்டர், C.R. ரியாஸ் நவ்ஷாத் ஆகியோர் செயல்படுகின்றனர்.
கீழ்க்கண்ட முகவரியில் ஆலிம் பப்ளிகேஷன்ஸ் இயங்குகிறது. அனைவரும் துஆ செய்யுங்கள்:
AALIM PUBLICATION FOUNDATION
82/324, 2nd Floor, Baitulmal Tamilnadu Building,
Triplicane High Road, Triplicane, Chennai – 600 005.
Phone: 044-4746 7373

நிதானம் மிகவும் தேவை

*நிதானம் மிகவும் தேவை*

*கான் பாகவி*

மே 23ஆம் தேதி தேர்தல் முடிவு எல்லாராலும் ஆவலோடு எதிர்பார்க்கப்படுகிறது. அதுவும் தேர்தல் முடிந்து ஒரு மாதம் கழித்து தமிழகத்தில் முடிவு வெளிவருகிறது.

வாக்குப் பதிவும் பதிவான வாக்கின் எண்ணிக்கையும் எளிதாகவும் விரைவாகவும் முடிவதற்காகக் கண்டுபிடிக்கப்பட்டதே வாக்குப் பதிவு இயந்திரம். மிகவும் பாதுகாப்பானது எனத் தேர்தல் ஆணையம் என்னதான் அடித்துச் சொன்னாலும், மக்கள் நம்புவதற்குத் தயாராக இல்லை. தில்லுமுல்லு செய்ய முடியும் எனச் சிலர் செயல்பூர்வமாக நிரூபித்தும் ஆணையம் நம்பவில்லை.

பலத்த எதிர்பார்ப்பிற்கும் ஏக்கத்திற்கும் மத்தியில் வெளிவரும் தேர்தல் முடிவு எப்படியும் இருக்கலாம்! கருத்துக் கணிப்புகளை உண்மைப்படுத்தலாம்! அல்லது பொய்யாக்கலாம்! எல்லாவற்றையும்விட, இந்திய ஒருமைப்பாட்டின் மீதும் தேச ஒற்றுமைமீதும் உண்மையிலேயே கவலை கொண்டுள்ள நல்ல இதயங்களுக்கு ஆறுதலான முடிவு வரலாம். அல்லது அதிர்ச்சியான முடிவும் வரலாம்.

முடிவு எதுவாக இருந்தாலும், மக்கள் அமைதி காப்பது மிகவும் முக்கியமான ஒன்று. பாதகமான முடிவைப் பார்த்துப் பொங்கி எழுவதோ, சாதகமான முடிவைப் பார்த்து ஆனந்தக் கூத்தாடுவதோ இரண்டும் கூடாது.

பாதகமான முடிவே வந்தாலும், தெம்போடு நின்று எதிர்கொள்வதைத் தவிர வேறு என்ன செய்ய முடியும்? சொல்லுங்கள்! உரிமைகள் பறிக்கப்படும்போது, அரசியல் சட்டம் மீறப்படும்போது, மொழி மற்றும் மதச் சிறுபான்மையினர் நசுக்கப்படும்போது சக்தியைத் திரட்டிப் போராடித்தான் ஆக வேண்டும்.

போராட்டமே வாழ்க்கையாகிவிட்ட சமூகம், நம்பிக்கையில் சமரசம் செய்துகொள்வதோ, உரிமைகள் களவாடப்பட வாளாவிருப்பதோ, அதிகார சக்திக்குமுன் மண்டியிடுவதோ ஒருபோதும் ஏற்புடையதல்ல.

*நம்பிக்கையோடு எதையும் எதிர்கொள்வோம் துவண்டுபோகமாட்டோம்!*

சதியில் சிக்கிய சிலோன் சிறுபான்மையினர்

# சதியில் சிக்கிய சிலோன் சிறுபான்மையினர்#
----------------------------------------
ஐ.எஸ்.ஐ. பற்றியும் அதன் பொய் கலீஃபா அபூபக்கர் பக்தாதி பற்றியும் நாங்களெல்லாம் பல ஆண்டுகளுக்கு முன்பே எச்சரிக்கை செய்ததை நம் இளைஞர்கள் பலர் நம்பவில்லை.அந்த ஆளை தம்பி இன்னும் பலர் தம் வாழ்க்கையையும் மார்க்கத்தையும் தொலைத்துவிட்டு ,ஒட்டுமொத்த சமுதாயத்திற்கே பேரிழப்பை ஏற்படுத்தியுள்ளனர்.அதன் விளைவுதான் இலங்கை கொடுமைகள்.

எங்கோ ஐரோப்பாவில் பள்ளிவாசலில் நடந்த கொடுந்தாக்குதலுக்கு இலங்கை தேவாலயங்களில் நடந்த தற்கொலை தாக்குதல் (அதுதான் காரணமாக இருப்பின்) எப்படி பதிலடியாக அமையும்?அந்த அப்பாவி கிறித்தவர்களும் மற்ற பொதுமக்களும் அநியாயமாகக் கொல்லப்பட்டது எந்த வகை நாயம்?

இதுதான் சாக்கு என்று ஏதோ காத்துககொண்டிருந்ததைப் போல பெளத்த தீவிரவாதிகள் அப்பாவி முஸ்லிம்களை அடித்துக் கொல்வது எப்படி நியாயமாகும் ?

இப்போது தெரிகிறதா இளைஞர்களே!இந்த ஐ.எஸ்ஸும் அதன் பொய் கலீஃபா அபூபக்கர் பக்தாதி என்பாரும் யார்;அந்த அமைப்பின் திட்டமென்ன?யாருடைய தயாரிப்பு?இனியாவது அந்தக் கொலைகார அமைப்பிடமிருந்து தப்பித்து உண்மையான முஸ்லிம்களாக வாழ முன்வாருங்கள்.

இஸ்ரேல் மற்றும் அமெரிக்காவின் தயாரிப்பே இந்த ஐ.எஸ்.இந்த பக்தாதி சிறையில் இருந்தபோது உருவாக்கப்பட்ட நயவஞ்சகன்.

முழு தகவல் அறிய கீழ்க்கண்ட எமது பழைய கட்டுரை வாசியுங்கள்.உங்களையும் நண்பர்களையும் காப்பாற்றுங்கள்.

இராக்கிலும் சிரியாவிலும் மனித நாகரிகம் கண்டிராத காட்டுமிராண்டித்தனமான படுகொலைகளை இஸ்லாத்தின் பெயரால் நிகழ்த்திவரும் ஐ.எஸ். இயக்கம் உண்மையில் யாருடையது; அதன் நிறுவனரும் தலைவரும் நான்தான் என்று வீடியோக்களில் காட்சியளித்து, தூய அரபிமொழியில் மிரட்டல் விடுத்துக்கொண்டிருக்கும் அபூபக்ர் அல்பஃக்தாதீ என்பார் யார்? இவர்களின் பின்னணி என்ன என்பதெல்லாம் தெரியாமல் உலக முஸ்லிம்களைப் போன்றே நாமும் குழப்பத்தில்தான் இருந்தோம்.

இந்நிலையில், குவைத்திலிருந்து வெளிவரும் ‘அல்முஜ்தமா’ எனும் இஸ்லாமிய அரபு மாத இதழில் அக்டோர் (2014) பிரதியைப் புரட்டிக்கொண்டிருந்தபோது, ஓர் ஆய்வுக் கட்டுரை படிக்க நேர்ந்தது. கட்டுரையை ஃபிரான்ஸ் கலாசாரத் துறை பேராசிரியர் டாக்டர், ஸைனப் அப்துல் அஸீஸ் எழுதியிருக்கிறார். ‘இராக் கிறித்தவர்களும் இனப் படுகொலை பற்றிய ஊகங்களும்’ என்பது கட்டுரையின் தலைப்பு.

கட்டுரையின் இறுதியில் டாக்டர் ஸைனப் எழுதியிருப்பதன் தமிழாக்கத்தை அப்படியே கீழே தருகிறோம். (இதில் நமது சொந்தக் கருத்து எதுவும் இல்லை.) நீங்களே முடிவு செய்துகொள்ளுங்கள்:

ஐ.எஸ். இயக்கத்தை அரபி இதழ்கள் சுருக்கமாக ‘தாஇஷ்’ எனக் குறிப்பிடுகின்றன. இதன் பொருள் ‘அத்தவ்லத்துல் இஸ்லாமிய்யா’ (இஸ்லாமிய அரசு) என்பதாகும். ‘கிலாஃபத்’ ஆட்சி என விளக்கம் கூறலாம். இந்த இயக்கத்தின் தலைவர் ‘அபூபக்ர் அல்பஃக்தாதி’யை ‘பஃக்தாது கலீஃபா’ என அவருடைய ஆதரவாளர்கள் அழைக்கின்றனர். இவரது பின்புலம் குறித்து முன்னணி இணைய தளங்கள், குறிப்பாக ‘Veteran Today’ எனும் இணையதளம் தோலுரித்துக்காட்டியிருக்கிறது.

பக்தாத் கலீஃபா, இஸ்ரேல் உளவு அமைப்பான ‘மொசாத்’தின் கையாள். இவர் யூதப் பெற்றோருக்குப் பிறந்தவர். அபூபக்ர் அல்பஃக்தாதியின் உண்மையான பெயர்: ஷைமோன் எலியூட். இவரை சியோனிஸ மொசாத், தன் உளவுப் பணிகளுக்காக உருவாக்கிப் பயிற்சியையும் அளித்துள்ளது. உளவுத் துறையிலும் வெளியுறவுத் துறையிலும் அவர் பயிற்சியை முடித்துள்ளார்.

அத்துடன், பல்வேறு இராணுவப் பயிற்சிகளுக்கும் உட்படுத்தப்பட்டார். பல்வேறு சோதனைகளையும் அவர் கடந்துவந்துள்ளார். இதுவெல்லாம் எதற்காக? அரபு மற்றும் முஸ்லிம்களின் வாழ்வையும் இஸ்லாமியச் சிந்தனைகளையும் அழிக்கும் சதிவேலைகளுக்கு எலியூட் தலைமை ஏற்க வேண்டும்; அழிவு சக்திகளை ஒருங்கிணைத்து வழிநடத்த வேண்டும் என்பதற்காகத்தான்!

இதில் பெரிய வேடிக்கை என்ன தெரியுமா? ஐ.எஸ். (Islamic State) அமைப்பு, பயங்கரவாத இயக்கங்களின் ஐ.நா. பட்டியலில் இடம்பெற்றுள்ள அதே வேளையில், அதற்குப் பொருளுதவி செய்வது அமெரிக்காவாகும். 2014 வரி ஆண்டுக்கான இரகசிய கூட்டத்தில் முடிவான சட்டத்திற்கேற்ப ஐ.எஸ். அமைப்புக்குப் பொருளுதவி செய்ய அமெரிக்க காங்கிரஸ் ஒப்புதல் அளித்துள்ளது. இது, 2014 செப்டம்பர் 30 வரைக்குமான ஒப்புதலாகும்.

இன்னொரு சுவாரசியம் என்னவென்றால், 2004 முதல் 2009 வரை 5 ஆண்டு காலம் குவாண்டநாமோ சிறையில் அபூபக்ர் அல்பஃப்தாதி இருந்துள்ளார். இந்தக் காலகட்டத்தில் சி.ஐ.ஏ. மற்றும் மொசாத் ஆகிய உளவுத் துறை அமைப்புகள் தம் பணிகளுக்காக ஆள் திரட்டியபோது அபூபக்ரைப் பயன்படுத்த எண்ணின. பல்வேறு நாடுகளில் இருக்கும் முஜாஹித்களை ஒரே இடத்தில் திரட்டுவதற்கு வசதியாக ஒரு குழுவை அமைக்கும் பெரிய பொறுப்பினை அபூபக்ரிடம் அவை கொடுத்தன. இக்குழு, முஜாஹித்கள் யாரும் இஸ்ரேலைத் தாக்கிவிடாமல் தடுக்கும் பணியைச் செய்ய வேண்டும் என்பது மொசாத்தின் திட்டமாகும்.

அபூபக்ர் என்ற ஒற்றரை மொசாத் தேர்ந்தெடுத்ததன் நோக்கம், இஸ்ரேலுக்கு அச்சுறுத்தலாக விளங்குகின்ற நாடுகளின் இராணுவ மற்றும் சிவில் வட்டாரங்களில் ஊடுருவுவதே ஆகும். அகண்ட இஸ்ரேலை உருவாக்குவதற்கு வசதியாகவும் அந்நாடுகளின் ஒவ்வொரு பகுதிமீதும் ஆதிக்கம் செலுத்துவதற்கு வசதியாகவும் சியோனிஸ ஆட்சியை உருவாக்கும் பணியை எளிதாக்க வேண்டும்.

உலகின் நாலா பாகங்களிலிருந்தும் தீவிரவாதிகளின் ஒரு பெரும் படையை ஓரிடத்தில் ஒன்றுசேர்த்து, ஷைத்தானின் உண்மையான படை இதுதான் என உலகத்திற்கு அடையாளம் காட்ட வேண்டும். அவர்கள் ‘லா இலாஹ இல்லல்லாஹ்’ எனும் கலிமா பொறிக்கப்பட்ட கறுப்புக் கொடியைத் தூக்கிக் காட்டுவார்கள். இதன்மூலம், இஸ்லாத்திற்கு எதிரான வெறுப்பை உலக மக்களிடம் விதைக்க முடியும் என்பது மொசாத்தின் கனவாகும்.

இப்படையினர், ஈவிரக்கமின்றி கைதிகளைத் துப்பாக்கியால் சுட்டும் கழுத்தை அறுத்தும் கொலை செய்வார்கள். இந்தப் பயங்கரமான காட்சிகளைப் படமாக்கி இணையதளம் உள்ளிட்ட ஊடகங்களில் வெளியிடுவார்கள். இவர்கள் இரத்த வெறிபிடித்த காட்டுமிராண்டிகள் என உலகம் அடையாளம் காண வேண்டும்.

யாராலும் சகிக்க முடியாத, மனிதாபிமானமே இல்லாத இந்த நிலைக்கு ஒரு மனிதன் வரவேண்டுமென்றால், ஒன்று அவன் போதைக்கு அடிமையாக இருக்க வேண்டும்; அல்லது இரத்தத்தையும் பயங்கரத்தையும் பார்த்துப் பார்த்துப் பழகிப்போனவனாக இருக்க வேண்டும். இதுதான் அமெரிக்க சியோனிஸ போர் உத்தியாகக் காலம்காலமாக இருந்துவருகிறது.

சுருங்கக்கூறின், ஐ.எஸ். எனும் இந்தப் படைக்கும் இஸ்லாத்திற்கும் எந்தத் தொடர்பும் அறவே இல்லை. இது, முஸ்லிம்களின் கரத்தாலேயே இஸ்லாத்தின் மீது போர் தொடுப்பதற்காக ‘பிளாக் வோட்டர்’கள் மூலம் அமெரிக்கா நிகழ்த்தும் நாடகமாகும்.